Mapa de incendios forestais

Exame de setembro de 2016

a) Nomee cinco provincias nas que o número de incendios de tamaño maior ou igual a 1 hectárea sexa superior aos de menos de 1 hectárea (1 punto)

As provincias nas que o número de incendios de tamaño maior ou igual a 1 ha é superior aos de menos dunha ha: Asturias, Cantabria, León, Zamora, Burgos, Toledo, Cidade Real e Guipúscoa.

b) Identifique o tipo de documento e indique as causas dos incendios (1 punto)

A figura é un mapa temático e con figuras de España con división provincial, e no interior de cada unha delas represéntanse, mediante histogramas, unha información sobre o número medio de incendios forestais por ano ‐distribuídos entre aqueles que queimaron máis ou menos dunha ha de superficie‐ durante o período 1995‐2005.
As causas dos incendios forestais poden ser humanas (intención delituosa de pirómanos, neglixencias na queima de restrollos e mantemento de pastos...) ou naturais, como a caída de raios cando se producen as treboadas.

c) Explique as razóns dos valores que afectan a Galicia (1 punto)

Galicia constitúe a zona de España na que arde cada ano unha maior superficie, malia que o clima húmido sexa menos favorable ao lume. Isto é debido a que a meirande parte dos lumes son provocados. Provócanse para tratar de manter os pastos para o gando en áreas de montaña, seguindo unha práctica tradicional que se poñía de relevo na antiga cava de estivadas. E detrás destas actitudes delituosas están ás veces os intereses de sectores económicos coa finalidade de obter cambios nos usos do solo para poder construír.
Hoxe en día, os riscos afectan en moitas ocasións a áreas poboadas que hai que desaloxar, dado que o abandono das actividades no rural provocou un crecemento incontrolado da matogueira.
Tamén os cambios de uso do solo, en especial a repoboación forestal que moitas veces se ten feito con especies pirófilas como eucaliptos, o que permite unha propagación máis cuantiosa dos lumes.
A desatención ao coidado dos montes, por estar en moitos deles en man común de veciños, tamén xustifica o desinterese polo coidado destes espazos, hoxe en día moi abandonados.

d) Expoña as consecuencias económicas e no medio natural dos incendios (1 punto)

Os incendios forestais producen graves consecuencias económicas e no medio natural.
Os danos humanos e económicos máis relevantes inclúen ás veces perdas humanas ‐por morte de xente implicada no seu sufocamento ‐, materiais ‐casas, vehículos...‐, perdas na silvicultura e deterioro de redes de comunicacións eléctricas, telefónicas..., entre outros.
En canto ás ambientais, á destrución da cuberta vexetal ‐cun incremento do risco de erosión do solo ao producirse as primeiras choivas torrenciais tras a queima‐ e a perda de animais que morren a consecuencia dos lumes, engádense as alteracións no balance hídrico das cuncas fluviais nas que teñen lugar os devanditos incendios, a contaminación das augas polos restos dos incendios, a perda de especies animais, incluso no mar polo arrastre das cinzas e perda de osíxeno das augas.